紅魔扑「錘」搶「客W」

猪拉多纳

費Sir下令場場砌盡

今晚英超韋斯咸主場迎戰曼聯，紅魔2.57倍「讓球客勝」要捧！曼聯吸取上季最後一刻失冠嘅教訓，領隊費格遜當然唔會重複犯錯，上場砌低史篤城攞咗執教生涯第900勝後，話明嚟緊場場砌盡唔畀機會曼城翻身，呢班魔將收晒「柯打」點會唔識做呀！（有線200及300廣東體育周四凌晨2:45直播）
韋斯咸後防穿窿漏水

曼聯核心朗尼盛傳轉投PSG，無論消息孰真孰假，唯一肯定嘅係佢每逢落場都出盡百二分力，上場聯賽有佢墮後一格喺中場派牌效果顯著，就算史高斯要繼續抖都唔成問題。之不過贏波關鍵始終係尹佩斯，佢啱啱打破咗長達751分鐘嘅入球荒，聯賽入球數目亦達到20+，撻番着副偈之後，梗係想力追以22球領先神射手榜嘅「哨牙蘇」，今晚唔使怕紅魔冇波入。

再者韋斯咸都有撐唔落，事關祖高爾拉傷大腿唔使預佢，削弱咗「錘仔幫」嘅進攻能力，加上雲斯頓列特、佐治麥卡尼同湯堅斯呢班後防主力仲全部傷晒，成條防線穿窿漏水，咁幫得手唔捧曼聯「讓客」等幾時？