曼聯食飽讓波咪亂篤

猪拉多纳

曼聯係歐洲一等一名牌球隊，長期受到散客追捧，不過去到季尾階段，佢哋喺聯賽已經甩開晒，嚟緊隨時會玩嘢，大家真係要小心。今晚「紅魔鬼」作客史篤城，兩隊教頭老友鬼鬼，曼聯教頭費格遜分分鐘讓路，作客讓波靠唔住，捧史篤城下盤！（有線300及200台周日晚9時05分直播）

曼聯啱啱喺聯賽輸畀死敵曼城，唔少人認為佢哋今次對住史篤城會發火贏番場，呢個只係大家一廂情願嘅睇法。「紅魔鬼」依家甩開次席曼城十二分，冠軍幾近成為囊中物，根本唔使場場搏盡。況且費爵爺同史篤城主帥佩尼斯有啲交情，如今史篤城有難，費Sir又有本錢在手，唔排除佢哋會放對手一條生路。就當今場真係打真軍，曼聯讓到一球都嫌多，呢場可博下盤，可兼顧埋大盤。
巴塞夠皮冇「薩」氣

同日西甲一哥巴塞隆拿作客薩拉戈薩，情況同曼聯嗰場有啲似，巴塞又係積分上大幅拋離對手奪冠在望，贏唔贏都冇乜所謂，反觀薩拉戈薩就要搶分保級，明刀明槍搏殺，決心好大。睇番今場個盤，巴塞作客讓到球半，佢哋剛於歐聯搏得盡，主將美斯今場冇隨隊，為咗以最佳狀態迎戰歐聯四強賽事，唔排除會避重就輕變陣出擊，呢場下盤值得捧場，又係要埋入球大，博雙殺！（now 632周一凌晨１時直播）