胯下不乏惡馬 柏寶有料到

猪拉多纳

　　原本今期賽事柏寶手執兩「寶」，頭馬坐住兩場，可惜「喜寶駒」退出，騎者即時少個贏馬機會，然則，今期柏寶依然有啲惡馬，而且大多係近績唔錯，賠率又唔乏味。

　　今日柏寶5匹坐騎之中，尾場「傾力之城」近績麻麻，講白啲應該係今季長期不在狀態，連輸6場！餘下4駒，全數在剛賽跑入前三名，其中第九場「一寶」更屬新勝馬。呢匹馬剛剛贏完一班賽，轉頭回到二班，真係幾筍。谷草1200米向來係首本路程，排2檔，條件好，何況，柏寶騎大摩馬，一定生生性性唔敢亂嚟，必會繼續搏。

　　而第一場1000米「駟馬難追」，前仗贏過「好利佳」，上場雖被反先，頭馬「心甜意合」再出再贏，前駒目前留在原班跑強項，點會冇優勢。

　　第八場1800米「薄荷糖」，之前表現時有時冇，上場卻能打叠上名，照計谷草1800米會比田草長途較易應付，料可增強威力。Jack