史浩克傷兵滿營「遜」唔過

猪拉多纳

雖然拜仁攞咗聯賽冠軍，但唔代表德甲冇睇頭，部分球隊仍要為下屆歐聯席位爭崩頭。好似周日凌晨史浩克就想借主場之利出擊，收窄同排第3嘅利華古遜之間嘅差距，從而博入下屆歐聯分組賽保「錢」途。不過睇番史浩克個陣滿布傷兵，試問又邊有本錢讓波？1.58倍「讓客」反而捧得過！

（有線61、64、201及203、中央5台周日凌晨0:30直播）
利華古遜作客對賽醒

史浩克近況討好的確吸引人撐場，但睇番佢哋贏嘅對手都係下游隊伍居多，難同今仗一樣要力保第3嘅利華古遜相比。最慘係主隊傷兵滿營，中場鍾斯、巴尼達、阿費利、守將柏柏度普路斯一早唔踢得，賽前仲多件翼鋒法芬養傷，中場紐斯泰達又要坐波監，成隊波散晒咁滯，咁嘅情況憑咩同人爭先？

另邊廂嘅利華古遜下半季確係有跌watt迹象，不過要贏佢哋始終唔易，況且今仗仲有後衞奧馬托柏克復出增強守力，加上射手傑斯寧同翼鋒舒賀爾尼仍然保持水準，隨時憑一兩個反擊偷襲得手。再睇埋對賽，利華古遜近6次作客史浩克，只係輸得1次，一於支持佢哋搶分而回。