紐卡素開「攻」做「大」事

猪拉多纳

紐卡素上季爭少少就可以踢到歐聯，點知今季喺英超就淪落到要護級，家陣佢哋唯一可以做嘅，就係爭番口氣搶歐霸盃。「喜鵲」今晚喺8強次回合主場迎戰賓菲加，要收復首回合輸1:3嘅失地係就係難啲，但呢班波勝在鬥志奇高，今場有權同賓菲加大演入球騷！

（有線63周五凌晨3:05直播）

紐卡素喺一月雖然賣走丹巴巴亞，不過佢哋仲有柏比斯施斯同賓艾化等殺手，就連艾美奧比都唔經唔覺累積咗50次歐洲賽上陣經驗，呢條鋒線嘅入球能力的確有一定保證。不過「喜鵲」最大問題係條防線勁多甩漏，首回合大衞辛頓嘅自殺式回傳，就睇到班球迷O晒嘴，米克威廉臣亦唔多可靠，吓吓靠門將告魯爾左飛右撲，有三頭六臂都唔掂啦！
賓菲加一對前鋒世界級

對家賓菲加揸住3:1優勢喺手，今場大條道理踢最耍家嘅穩守突擊，巴拉圭射手奧斯卡卡度素嘅速度同射術都係世界級，佢同巴西前鋒洛迪高利馬今季加埋入咗超過40球，鋒力超勁，今場再隊紐卡素幾粒都唔奇！

首回合：紐客負1:3

頂占筍盤：紐卡素（入球大）