畢爾包前線啞火撐西維爾

猪拉多纳

「沒落勁旅」大激鬥！今晚西甲獨腳戲有近兩年戰績下滑嘅西維爾，迎戰由上季「雙亞王」淪為下游分子嘅畢爾包，不過西維爾喺自己地頭發揮理想，有力打殘火力麻麻嘅客軍，讓半一照捧1.81倍上盤！

（now632台周二凌晨4:00直播）

畢爾包上季喺西班牙盃同歐霸盃殺入決賽都大敗收場，不過就算主將查維馬天尼斯離隊、洛蘭迪因為轉會問題淪為後備，小妹都冇預期佢哋嘅戰績會滑落得咁快，唔止一度跌落11場得1勝嘅谷底，即使嚟到季尾有啲回勇，但近7場都未試過單場有2球或以上進帳，主力射手阿度里斯今場又未必出得，另一前鋒蘇沙亞達亦要停賽，咁啞火法今仗想搶番1分都難。

不嬲係西甲前列常客嘅西維爾，由上季開始就愈踢愈頹，唯一慶幸嘅係佢哋喺比斯祖安球場威力依舊，近9戰就有7場贏波，近兩場喺自己地頭更分別取得4個「士哥」添！就算快翼捷西斯拿華斯停賽，有近4戰入咗5粒嘅王牌射手尼格度同拿傑迪錫等攻擊手拍住上，畢爾包睇怕都係咁先喇！