西維爾血性回歸 搶主Ｗ

猪拉多纳

畢爾包闖地獄未踢先怯

斯維嚟緊呢個星期將會遠赴南韓叉叉電，但當地依家烽煙四起，北韓試射導彈橫飛，今趟旅行認真搵命博，情況同畢爾包差唔多，因為「巴斯克雄獅」今晚喺西甲要作客西維爾嘅地獄主場，可謂九死一生，斯維臨行前推介主Ｗ。

（now 632周二凌晨4時直播）

今季畢爾包出咗名係西甲蠱惑球隊，佢哋神起上嚟可勇挫馬體會、華倫等硬嘢，衰起上嚟坐鎮主場都畀薩拉戈薩、華歷簡奴、愛斯賓奴砌低，表現飄忽成咁，買波時真係避之則吉。

不過「巴斯克雄獅」亦有樣嘢好，就係今季作客表現「穩定地差」，14仗輸足8場，真係未踢先怯，見到都唔開胃。
艾美利領軍氣勢如虹

西維爾嘅主場強勢好得人驚，自從前華倫教頭艾美利喺一月走馬上任後，連埋盃賽喺比斯桑球場一共踢咗7場波，未輸過之餘仲贏咗6場添，認真威水。

艾帥一向激情四射，鼓吹進攻足球，亦喚醒咗眾將嘅血性，尤其係尼格度非常搶韁，呢位大舊衰中鋒衝得撞得，配合雷恩斯同捷西斯拿華斯喺兩邊源源不絕嘅輸送，令佢入波好似食菜咁食，依家全隊氣勢如虹，畢爾包喺呢個時候作客去到比斯桑球場，猶如闖入「死亡國度」送羊入虎口，主Ｗ實在係不二之選。