今季首場新馬賽 伽楠大勝

猪拉多纳

尋日就跑今季首場新馬賽，由於三歲北半球馬要讓兩歲南半球馬九磅，所以呢類新馬賽通常都係南半球馬嘅天下，結果今場只得「伽楠」同埋「全因有你」兩隻澳洲馬，就跑出呢條Q，派彩仲有$452.5，認真和味。至於賽前贏晒三課大閘嘅1.3倍大熱門「你知我心」，到中段已經散晒，最終三甲不入。
       
伽楠輕鬆拋離對手，一出即勝。
兩歲馬單Q$452.5

講開贏馬嗰隻「伽楠」，上個禮拜二就由蔡明紹試沙田800米閘，但今鋪嘅鞍上人就係韋達，反而蔡明紹就冇馬騎。
       
大摩勝出今季首場新馬賽。

大摩就話都係拉士一刻先決定搵韋達幫手，仲同佢講「伽楠」餐士好好，結果真係一出即贏大勝三又四分一馬位，大摩話為咗報答蔡明紹係晨課幫過手，都要請佢食返餐飯。另外，大摩話一早將「伽楠」嘅目標鎖定首場新馬賽，佢覺得隻馬試閘都唔差，唔明點解賠率咁冷，雖然日後應該跑1200至1400米好啲，但一樣會跑下個月1號嘅一千米新馬賽，希望可以再下一城。