廣州剷除蒙通聯息民憤

猪拉多纳

FC廣州今日喺亞冠盃F組主場對蒙通聯，熱捧1.62倍「讓球主勝」着數。今季恒大表現普通，日前更加爆出主力集體食煙隊酒嘅醜聞，但話晒都係連續兩季中超冠軍，唔想做箭靶畀球迷插，當然要踢番場翻身戰省招牌。

（now670台及廣東體育周三晚8:00直播）

由於恒大嘅超班球員多到用唔晒，中場黃博文停賽根本唔會有咩影響。不過咁，日前恒大喺中超作客以1:1打和FC北京，賽後有人喺微博爆料，有圖有真相咁指證兩隊比賽完食飯聯誼，枱面上有煙又有酒，至於在場被影到嘅恒大球員就至少有中鋒郜林同中堅馮瀟霆。
蒙通聯上輪負紅鑽1:4

本來球員食煙唔係死罪，不過恒大規定任何球員食煙或者飲酒都會被踢走，呢班富貴球星今次畀人隔空篤背脊，即使未至於冇得撈，相信點都要踢番場好波氹老細。對家蒙通聯有泰國射手鄧達同隊長方拿奧孭飛，睇落未至於係魚腩，弊在上輪作客以1:4慘負浦和紅鑽，唔好睇太高。
亞冠盃、南美自由盃賽制

32支球隊分8組進行小組雙循環賽，每組首、次名躋身16強。