FC首爾射爆維加泰

猪拉多纳

獵「英」殺手丹恩奴域衝鋒

亞冠盃分組賽第三輪展開，今次集中火力研究東亞區賽事，E組南韓名牌球隊FC首爾主場對日職代表仙台維加泰，首爾黑山中鋒丹恩奴域早前喺外圍賽射死英格蘭勁到爆，對住維加泰防線士哥冇難度，蘇豪一於熱捧主勝！

（周二晚6時30分開賽）

丹恩奴域上年成為韓職神射手兼MVP，返到國家隊一樣有料到，佢上周代表黑山喺世界盃外圍賽決戰英格蘭，下半場後備入替落場士哥成功，賽後仲寸英軍冇膽，估唔到對手打得咁差，招積到爆！丹恩奴域對住英格蘭一班星將都搵到食，「降呢」返到亞冠盃鬥仙台維加泰真係超晒班，首爾分組賽首戰主場5比1大炒FC江蘇，丹恩奴域有兩球進帳，恐怕維加泰頂唔住呢個星級前鋒。

仙台維加泰本身實力唔算好強，佢哋進攻完全倚重射手威爾遜洛迪古斯同赤嶺真吾，後者近期有傷在身，今戰肯定冇份落場，得番威爾遜洛迪古斯一個攻堅，火力必定大減。單睇聯賽戰績，今場對賽雙方開季都係唔順，但首爾起碼喺亞冠盃展現過強勁火力，反觀維加泰分組賽兩戰僅入一球，踢落真係冇乜進攻板斧，受讓都冇着數，呢場可捧主勝！
武里南聯「+1」打劫江蘇

同組泰國勁旅武里南聯作客中國代表FC江蘇，武里南聯兩個西班牙兵奧斯馬巴巴同卡美路都有分量，大軍分組賽兩戰仙台維加泰同FC首爾保持不敗，對住日韓球隊都頂得住，真係有料到，今次面對實力一般嘅中超球隊江蘇應可保不敗，要「讓球客勝」。

（now671周二晚7時40分直播）