倫敦打吡撐QPR

猪拉多纳

夏利叔護級借富耍家

今晚英超獨腳戲上演倫敦打吡戰，昆士柏流浪（QPR）作客鬥富咸，自夏利列納領軍後，QPR喺打吡戰未嘗敗績，戰績夠晒說服力，目前佢哋護級情況危急，餘下每戰必以三分為目標，有埋呢份不勝無歸嘅決心，蘇豪認為絕對值得支持，QPR受讓捧「讓球客勝」！

（有線200及300台周二凌晨3時直播）

夏利列納喺英國球壇被尊稱為護級專家，佢上年十一月尾臨危受命接掌QPR，雖然班波到依家都未能逃離降班區，但整體演出已經好咗好多，幾個喺冬季轉會窗加盟嘅球員近仗交足貨，射手雷米反擊時威脅好大，快翼安祖斯唐辛突破力強，連贊拿斯都鹹魚翻生，加埋森莫亞及保夫萊特等大舊中鋒，兵力唔成問題。

修咸頓同韋根等護級分子上個周末成功搶分，未計尋晚阿士東維拉場波嘅戰果，昆士柏流浪落後尾四韋根七分，今場拎一分都冇乜幫助，定必傾力爭勝。QPR上次作客富咸淨吞六蛋，不過夏利列納領軍四次出戰倫敦打吡錄得兩勝兩和，包括首循環主場贏富咸，另於主場和熱刺，作客砌低埋車路士，賽績相當硬淨。
富咸風流波讓唔起

富咸近況唔錯，對上四戰不敗全贏盤，最叻係上場作客搞掂熱刺，不過佢哋現時已有三十六分在手，高不成低不就，大把本錢踢風流波，去到季尾階段呢類球隊最唔可靠，讓波必反！
昆士柏場場硬仗唔易啃！

昆士柏流浪餘下７輪聯賽對手唔易啃，愛華頓、阿仙奴、利物浦要爭踢歐洲賽，其他對手除咗史篤城較為遠離降班區域，全部都要搶分護級，當中下輪主場鬥韋根更加係關鍵六分波，如果今場連富咸都贏唔到，護級前景更加悲觀。