法蘭克福龍門生銹大劑

猪拉多纳

格雷特霍夫博奇迹豁出去

德甲格雷特霍夫主場對法蘭克福，雙方近期嘅比賽入波都唔多，不過兩軍都啱啱經歷重大轉變，今晚對碰情況唔同晒，黑柴深信會係入球騷，大盤有2.1倍好值博。

（有線61及64台周日晚11時30分直播）

格雷特霍夫排緊德甲包尾，距離尾三護級附加賽席位有9分差距，餘下8輪賽事想護級真係需要奇迹。不過球會領導層並未放棄，上次主場0比3不敵賀芬咸後決定換帥一博，上仗作客雲達不來梅喺新帥基拉馬帶領下全場同對手鬥攻，最終踢成2比2。雖然對護級幫助唔大，但起碼激發起球員鬥志同信心，今晚主場出擊和波同輸根本冇分別，當然豁出去喪攻。

法蘭克福近6輪未贏過，但球隊喺過去一周接到唔少消息，當中有好有壞，好消息係得到電訊公司嘅新贊助，喺未來3年可以得到2000萬歐元贊助費，會方亦承諾擴軍，可以全力衝擊下屆歐聯參賽資格，呢個消息令受到史浩克04挖角嘅教練艾明費回心轉意，立即動筆同球會續約。目前德甲第4位之爭十分激烈，今仗面對包尾大幡當然要力爭3分。
老門將尼高洛夫臨危受命

法蘭克福上仗主場不敵史特加，但總算打破近期入球荒，不過最唔好彩係今季表現神勇嘅門將奇雲查普，竟然喺拍攝德國U21宣傳片時離奇受重創要長抖。呢位門將每場都救唔少險球，根據權威網站《踢球者》平均評分，佢係今季德甲最佳門將，艾明費今場要倚重久疏戰陣嘅38歲老將尼高洛夫把關，佢今季只曾喺德國盃對乙組仔奧厄踢咗70分鐘，但竟然連失3球，何況主力中堅森拜奴喺國際賽帶住傷病返嚟上陣成疑，防線中門大開，絕對有利格雷特霍夫入波。