法國留力小勝「格」

猪拉多纳

世盃外圍賽歐洲區I組，法國同西班牙會喺下周三交手，莫講話我哋球迷心急等呢場波，就連法國主帥迪甘斯都話聽日凌晨對格魯吉亞嘅出場名單，都要考慮埋下場惡鬥「狂牛」嘅因素，暗示今晚會留力，既然係咁，不妨冷敲4.1倍「讓球和」仲好！

（now714台及中央5台周六凌晨4:00直播）

賽前迪甘斯話預咗格魯吉亞死守，要諗定方法破密集，不過佢講唔夠兩句，就話擔心中場馬度迪、干拿倫斯、卡比耶同中堅哥斯尼，驚佢哋今場再拎黃牌就冇得對西班牙，暗示今晚唔會去到盡。為破鐵桶陣，有傳「高盧雞」會用遠射能力不俗嘅保羅普巴取代卡比耶，擅頂嘅皇馬中堅華拉尼就代替哥斯尼擔正，論球員質素，始終贏格魯吉亞一大截。

格魯吉亞雖然唔係咩勁旅，但佢哋上年9月對西班牙都係只輸1球，就知佢哋防守力唔差。佢哋陣中最出名嘅係安玻里前鋒麥希里迪斯、前史浩克04中場堅尼亞，可以話「魚腩唔晒」，一人跑多步都唔會輸太多。睇番佢哋上次喺2007年歐國盃外圍賽作客法國都係輸1粒，今鋪兩軍情況差唔多，一於博多鋪「讓球和」。