比利時黃金一代吼客Ｗ

猪拉多纳

世界盃外圍賽歐洲區A組賽事，今晚有馬其頓主場對比利時，Anton長居於比利時，我同大部分比利時人都對自己嘅國家隊充滿信心，賽前亦同我哋嘅馬其頓戰友Louis交換情報，我哋嘅推介首選1.64倍比利時客勝，次選要埋2.19倍好分頭嘅入球大。

（周六凌晨3時45分開賽）

目前嘅比利時國家隊堪稱「黃金一代」，我哋喺A組同克羅地亞並列榜首，Anton深信比利時有力繼2002年後首次打入大賽決賽周，出席2014年喺巴西舉行嘅盛事。比利時領隊韋莫斯今次選咗25名球員作客馬其頓，雖然後防大將高柏尼養傷多時未必夠弗上陣，但由拜仁嘅老將雲拜頓取代佢亦綽綽有餘，另外守將盧柏迪斯同中場桑基列特都有傷，不過比利時確人才濟濟，好似韋素、費蘭尼、維頓漢、梅頓斯同泰拔高圖爾斯等等，都係年輕當打嘅優質球員，前線又有喺英超當紅嘅賓迪基同盧卡古攻堅，呢個陣容足以令好多大國羨慕。
作客馬其頓開入球騷

馬其頓較早前贏過塞爾維亞，今仗又喺座無虛席嘅斯科普里主場出師，不過以波論波，馬其頓點都低一線，佢哋陣中門將柏高華斯基、中場特拉伊科夫斯基同卓高華斯基都喺比利時聯賽搵食，級數只係一般，全隊最大威脅當然係効力國際米蘭嘅彭迪夫，Anton深信比利時有足夠實力贏呢場波，至於Louis亦同意比利時贏面高，但佢好肯定馬其頓可以喺主場入波，今場波膽預期係1比2或者2比3，入球大有咁好分頭值得一博。