松鼠山葉焗捱細界

猪拉多纳

撞正國際賽期 兩軍射手no show

日本聯賽盃首輪分組賽今日展開，國際賽當前，唔少球員離隊為國家隊服役，A組大宮松鼠主場對磐田山葉，雙方都有射手缺陣。松鼠一對斯洛文尼亞前鋒隆比真歷及路華高域，已飛返歐洲，山葉亦有進攻靈魂前田遼一代表日本備戰熱身賽及世界盃外圍賽。兩軍唔齊腳匆匆再戰，勢必影響進攻表現，捧入球細。

（周三下午3時開賽）

兩隊剛於月初日職交手，大宮松鼠小勝1比0，有晒辦畀大家睇。事實上，松鼠本身唔係一支擅攻球隊，踢法粗枝大葉，喺中場支援不足情況下，往往要靠前鋒自己搵食，因此兩位外援隆比真歷及路華高域嘅發揮極之重要。咁唔好彩兩人一齊入選咗斯洛文尼亞國家隊，出戰周五晚世界盃外圍賽，等同剝咗松鼠一對利齒，唔好話要贏多一次，想入波都難。
前田遼一缺陣冇戲唱

磐田山葉亦唔好得幾多，事關前田遼一多年來都係球隊主力射手兼精神領袖，食粥食飯都旨意晒佢。前田遼一開季之後狀態麻麻，連帶山葉成績低落，日職三戰未贏過，今仗冇埋佢，更難發圍。值得一提，山葉近五次作客松鼠，只入得一球，明顯格食格受制對方爛打戰術，預料今次冇乜交收。
B組櫻花唔怕鯨魚

B組分面，名古屋鯨魚主場對大阪櫻花，日職開咧冇耐，鯨魚似乎未「撻着」，教頭史杜高域又搵中堅田中鬪莉王串演中鋒，效果唔算好，面對來勢洶洶嘅櫻花難言穩勝，櫻花「讓球客勝」抵玩。