QPR回勇發「維」

猪拉多纳

列納有料成隊波生晒

依家英超尾5嗰幾隊波嘅距離唔夠6分，勁緊湊，今晚有場護級大戰，尾4嘅阿士東維拉喺主場迎戰包艇嘅昆士柏流浪，QPR喺冬季搵咗「護級專家」夏利列納執教鞭，家陣總算有起色，挾住2連勝走勢造訪海鮮波維拉，應該有分落袋，1.67倍「讓客」值得一試。

（有線202及302周六晚11:00直播）
維拉鄧尼重創或收山

昆士柏前排有射手森莫亞重傷初愈，但佢一復出就連帶法國前鋒雷米都生猛晒，領隊列納賽前仲大讚佢兩位老哥有料到：「森莫亞可以Hold住個波，雷米就有速度有射術，佢哋會合作得好好。」果然，雷米連續2戰有士哥帶挈QPR兩連勝，加埋「小朋友」唐辛愈踢愈好，成班波士氣高昂信心足，要贏佢哋真係唔易o架。

相對QPR愈踢愈好，主隊阿士東維拉就問題多多嘞。如果唔係比利時前鋒賓迪基單天保至尊，依家排包尾嗰隊好可能係維拉而唔係昆士柏！質素本身麻麻嘅維拉，賽前仲傳出中場基斯靴特因傷提早收咧，後防主將李察鄧尼仲嚴重到隨時收山，點睇都唔似信得過啦！
頂占筍盤：昆士柏流浪（讓球客勝）