佐藤養傷廣島讓唔起北京

猪拉多纳

今晚亞冠盃上演第2輪分組賽，FC北京會喺G組主場迎戰廣島三箭。北京經過首輪熱身後明顯上力，喺中超開咧戰更大炒對手，今場遇着睇落剛贏波止血，實情係陣容同狀態都存在隱憂嘅三箭，梗係撐1.48倍+1「讓主」！

（now671台周三晚7:30直播）
北京靠射手簡路迪數胡

廣島三箭貴為日職衞冕冠軍，季前仲憑聯賽神射手兼MVP嘅佐藤壽人一箭定江山，成功勇奪日本超級盃，不過佢哋連隨輸畀賓約哥同浦和紅鑽後，雖然喺聯賽砌低新潟天鵝，表面睇好似係止咗血，但實情當家射手佐藤壽人喺近3場都顆粒無收，今次仲養傷冇隨軍，中場主力高萩洋次郎亦都打柴，同米傑治齊齊養傷，無論火力同陣容都唔係最強。

另邊廂，FC北京首輪作客浦項制鐵雖然互交白卷，但就成功提升班波嘅比賽狀態，喺中超開咧戰主場鬥上海東亞，即使收起中場主力邵佳一，照樣狂風掃落葉大炒對手4:1，前線又有効力過西維爾嘅射手簡路迪數胡，主場有得受讓唔捧等幾時！

亞冠盃G組
亞冠盃及自由盃賽制

32支球隊分8組進行小組雙循環賽，每組首、次名躋身淘汰賽。