史雲斯托弗 狙擊殘兵西布朗

猪拉多纳

今晚西布朗會喺英超主場迎戰聯賽盃新科冠軍史雲斯，雖然客軍領隊米高盧特立指西布朗今季表現令人驚喜，但主隊家陣受到嚴重傷兵潮困擾，唔似可以扭轉頹勢，「白天鵝」受讓平半當然捧1.92倍「下盤」啦！

（有線200及300周六晚11:00直播）

近況頹爆嘅西布朗近11戰只係贏過2場，家陣主力射手沙恩朗同埋隊長布拉特都未必踢得，鋒力大減，前線只靠1月份鬧轉會嘅奧丹維治頂上，不過正如領隊奇勒話齋，依家只期望奧丹維治可以生生性性踢到季尾，擺明暗示佢鬥心唔強，又點敢旨意佢帶起隊波吖！

史雲斯領隊米高盧特立形容今仗雙方都係今季「驚喜」球隊，但史雲斯近3次喺英超對住西布朗都能贏波而回，而且佢哋近4場賽事贏足3場，畀利物浦大炒亦只因留力聯賽盃，證明佢哋仍然狀態極弗，相信今晚有力繼續食住西布朗o架！