羅馬熱拿亞又做大龍鳳

猪拉多纳

差唔多成個禮拜冇同大家見面，近排表面上風聲緊，但原來好多大老闆收收埋埋，事前冇乜揚到出嚟，場波踢完一睇賽果你就明，所有嘢根本冇停過。
要翻前年受查舊帳

點解會畀大家感覺好似好靜，咪就係意大利打假第二波開始，仲有國際足協將七十幾名職員同球員停賽，有啲仲要終生唔准掂足球事業添，呢單嘢睇番張名單，又係意大利佔大數。講開打假案，真係不得不提祖雲達斯主帥干地，今次又有佢份，上次係佢教緊錫耶納嘅時候知情不報，今次輪到巴里。干地08/09年就係執教巴里，當年一場波懷疑有球員放水，干地又要被人傳召去聽證會。

嗱，要翻舊帳嘅，Deal兄提一提大家，2011年2月熱拿亞主場對羅馬，當時羅馬領先3:0，但去到51分鐘托迪入完第三球後，熱拿亞喺1分鐘之後就入番一粒，最終熱拿亞反勝4:3，好明顯呢場唔似一場正常比賽，場波成為調查對象之一。今晚呢兩隊又對碰喇，今次就羅馬主場，呢場最終邊隊贏都好啦，預計又係一場大龍鳳，你入吓我又入吓咁款，點買，唔使教喇啩？