馬拉加「+1」體定食

猪拉多纳

主場穩守突擊專劏名牌

今晚西甲爆發「雙馬大戰」，馬拉加主場迎戰馬德里體育會，後者上周中多踢一場西盃，與西維爾激戰過後攰到爆之餘，仲搞到損兵折將，面對以逸待勞嘅馬拉加蝕晒章，主隊有得受讓咁筍，斯維梗係揀「讓球主勝」喇！

（now 632周一凌晨2時直播）

上周中西盃四強次回合，馬體會作客領先兩粒情況下，畀西維爾狂攻追到氣咳，最終2比2打和。雖然馬體會總算成功殺入決賽，但球員體力消耗極大，成班波真係攰到爆，匆匆再戰未必回得切氣，同時葡萄牙中場堤亞高文迪斯仲喺此役受傷，連同上仗聯賽領紅需要服刑嘅基比，冇咗兩大硬朗防中做屏障，今仗作客必大踢穩陣波。
馬體會西盃激鬥未回氣

馬拉加近況都麻麻哋，不過該隊勝在防守穩健，由迪米捷利斯夥拍隊長維列頓領銜嘅防線，今季只失二十四球位列聯賽前三，而且無論聯賽或歐聯都喺主場贏過皇馬、華倫西亞同AC米蘭，可謂遇強愈強。

最近車路士領隊賓尼迪斯表示季尾離隊，即刻傳出馬拉加主帥比歷連尼「上車」嘅消息，呢位「智利工程師」甚至為此推咗羅馬嘅邀請，今仗對住二哥馬體會梗係要騷下「哥利」啦！加上馬拉加有整個星期備戰此役，嚟緊周中又冇歐聯後顧，面對實力受削兼兵疲嘅「床單兵團」，主場有得受讓真係筍到爆，「讓球主勝」捧得過。