柏雷素爾轉會大贏家

猪拉多纳

日職今季轉會大贏家係柏雷素爾，佢哋留住大部分主力，再由廣州恒大借用巴西射手基奧，同時簽下南韓守將金昌洙，加上由橫濱水手引入兩大中場谷口博之及狩野健太，三線實力平均，絕對不容忽視。另一矚目轉會係李忠成由修咸頓回流加盟FC東京，呢位星級射手喺「聖人」冇乜機會落場，但話晒都浸過鹹水，轉戰日職夠踢。至於川崎前鋒就向降班球隊埋手，成功撬走大阪飛腳中堅中澤聰太及神戶勝利船射手大久保嘉人，攻守能力增強，可成一路奇兵。

日職今季繼續有唔少球員出國搵食，其中名古屋鯨魚兩大主力永井謙佑同金崎夢生同時外流，肯定會削弱大軍戰鬥力，佢哋若想喺新季保持火力，就要睇吓曾經去過德甲搵食嘅新前鋒矢野貴章交唔交到貨喇。