拜仁復仇多蒙特

猪拉多纳

安聯出擊踢到曉飛

德國盃半準決賽重頭戲當然係「國家打吡」，班霸拜仁慕尼黑同上屆雙冠王多蒙特上演宿敵對決，近期遇神殺神嘅拜仁雖有「國王」列貝利停賽，但黑柴認為呢個小缺陷只會令今場大戰更加緊湊，於安聯球場主場強勢出擊，有超強復仇欲望嘅拜仁仍然會係今仗最終勝利者，拜仁讓半一照撐上盤。

（無綫翡翠台周四凌晨3時30分直播）

今季德甲雖然只係踢咗三分之二賽程，不過拜仁喺積分榜上拋離次席多蒙特17分，重奪聯賽錦標只係時間問題，德甲爭霸冇睇頭，今晚呢場德國盃就牙骹味濃。拜仁近季面對多蒙特吃盡苦頭，全隊矢志要借目前強勢大報復，正如右翼湯馬士梅拿話齋，今次多蒙特嚟得啱晒時間，拜仁已做足準備對佢哋迎頭痛擊。
多蒙特主力傷疲

自去年12月中聯賽逼和慕遜加柏後，拜仁喺三線作戰已錄得八連勝，合共轟入24球只失2球，每場賽事都最少贏對手兩球或以上，超強狀態堪稱恐怖。球隊最大改進係防線，自從未成氣候嘅畢斯杜巴養傷同技遜一籌嘅謝路美保定被打入冷宮後，教練軒歷基斯重新倚重經驗豐富嘅雲拜頓鎮守防線中路，佢同丹迪嘅合作滴水不漏，穩陣到連鋼門紐亞都嗌悶。當然拜仁進攻線亦弗到漏油，湯馬士梅拿、卻奧斯同文迪蘇傑每戰都交到貨，列貝利缺陣對球隊無疑會構成一定影響，但取代佢嘅洛賓已重拾佳態，拜仁攻力依然極有睇頭。

多蒙特近三次德甲作客拜仁取得二勝一和佳績，近期對賽唯一失利係季前德超盃輸1比2，不過目前佢哋並唔喺最佳狀態，近四場正式賽事只曾一勝，剛周日作客賽和慕遜加柏演出亦十分平庸，今仗主力巴拉斯塞高斯基、比薛斯基同曉姆斯都新傷初愈，賽前都冇正常操練，今仗勉強紮住上陣，喺高手過招場合相當吃虧。目前嘅拜仁係全歐洲狀態最好球隊，今晚讓得起冇十足狀態嘅多蒙特。