武里南聯闖仙台發「維」

猪拉多纳

「泰國曼城」亞洲新勢力

亞冠盃分組賽正式開打，「泰國曼城」武里南聯喺E組首戰作客日職球隊仙台維加泰，武里南聯有政客尼溫（Newin Chidchob）全力支持，近年簽入大批高質外援，兩個西班牙兵奧斯馬巴巴同卡美路級數超晒班，佢哋喺外圍賽踢走澳職代表布里斯班獅吼絕非符碌，今次有力再製造冷門賽果，冷敲「讓球客勝」！

（now 671周二晚6時直播）

武里南聯2010年獲尼溫收購，隨即開大水喉瘋狂擴軍，翌年成功稱霸泰超。大軍上年喺亞冠盃頭兩場分組賽砌低日職勁旅柏雷素爾同中超班霸廣州恒大（FC廣州），雖然最後四場輸晒出局，但面對幾支亞洲勁旅踢落差距唔大，已經好叻。

武里南聯今季繼續加碼增兵，現時擁有前桑坦德中堅奧斯馬巴巴、前希杭中場卡美路，又向名古屋鯨魚撬走黑山中場貝辛奴域等，陣容強大。武里南聯喺外圍賽面對布里斯班獅吼不落下風，出線合理，今戰對住日職大軍仙台維加泰被睇淡，但實際差距唔大，「讓球客勝」好分頭，博得過！
蒙通聯做東唔怕「車」

同日另一支泰超球隊蒙通聯主場迎戰韓職勁旅全北汽車，蒙通聯新年來港踢賀歲盃，香港球迷應該唔會陌生，呢班波不嬲好識搞噱頭，之前搵過利物浦名將科拿幫手，知名度提升唔少，今季搵來前奧地利國腳級射手連斯，呢位球星名氣同實力兼備，喺賀歲盃演出都算對辦。蒙通聯今次主場出戰搶分決心大，名牌球隊全北汽車客勝有1.92倍，明顯熱唔透，可博「讓球主勝」。

（now 671周二晚8時直播）