列奧斯倒戈 多蒙特「遜」得過

猪拉多纳

今晚慕遜加柏主場鬥多蒙特場德甲，焦點肯定係轉會後首度回歸保路西亞公園嘅馬高列奧斯！呢位倒戈戰將上場聯賽大演帽子戲法，今仗亦預期會受到舊會擁躉嘅熱烈歡迎，當正主場咁踢，就算冇「羅拔仔」幫拖都冇有怕，一於捧多蒙特，要2.25倍「讓客」。（有線61、64及204周日晚10:30直播）

前日馬高列奧斯接受《圖片報》訪問，話冇慕遜加柏嘅栽培就冇今日嘅成就，有慕遜球迷組織亦講到明唔會柴佢台，連母會Fans都撐，馬高列奧斯邊使驚倒戈入波唔好意思吖？多蒙特有首席射手羅拔利雲度夫斯基同舒希巴停賽，即係話今晚冇正宗前鋒，但馬高列奧斯昔日喺慕遜正正係打箭頭上位，有佢同馬里奧葛斯衝鋒陷陣，火力一樣夠晒猛。
慕遜首循環喪吞5蛋

主隊慕遜歇冬後5場德甲只係贏過1場咁大把，攻擊中場靴爾文儲夠黃牌自動停賽，呢班波近6仗仲場場有失波添，正式係攻又唔得、守又唔掂。況且慕遜喺上周中啱啱不敵拉素，歐霸盃32強止步，舟車勞頓之餘士氣亦受挫，隨時繼首循環喪吞多蒙特5蛋後再輸鋪甘！