紅魔掃「雷」吼半場大

猪拉多纳

是日英格蘭足總盃十六強獨腳戲由曼聯主場對雷丁，「紅魔鬼」歐聯搏到甩轆，主帥費格遜今戰定必收起班主將，輪到班優質後備兵登場搏殺，砌低下游分子雷丁冇難度，但主勝熱到燙手冇投X價值。兩隊首循環聯賽碰頭上半場炮製七個士哥，誇張到爆，雷丁今季打盃賽興做急先鋒半場例大，一於博「半場大」啦！

（now 635周二凌晨4時直播）

曼聯上周中歐聯作客皇馬放下尊嚴專心死守，反擊次數唔多，但次次入肉，和波有晒交代。「紅魔鬼」主將們全場奔走撲波，連箭頭朗尼都要全力助守去得好盡。費Sir向來識留放，今戰對手只係弱旅雷丁，殺雞唔使用牛刀，預計尹佩斯同里奧費迪南等有得抖抖，輪到一眾後備兵頂上，其中「小豌豆」查維亞靴南迪斯餓波多時，拿尼及路爾斯安達臣等中場絕對唔曳，仍然保持強勁火力。
早早搞掂留力聯賽

雷丁季內最重要係保住英超席位，但佢哋打盃賽都有火，今季聯賽盃連足總盃五戰法定時間內未輸過，包括喺主場同阿仙奴踢成四比四，呢五場盃賽半場最少都有兩球交收，反映佢哋打盃賽特別「性感」，勁鍾意同人鬥攻。雷丁首循環聯賽喺主場三比四不敵曼聯，七個入波都喺上半場產生，佢哋上次以高空攻勢炸散「紅魔鬼」防線，今戰可重拖故技狂吊高波埋去湧，隨時又搵到食。

曼聯今季殺得性起，老費又發起三冠王夢，實力分子阿仙奴被踢出局，少個香爐少隻鬼，「紅魔鬼」爭盃決心大，實會快刀斬亂麻，早早搞掂雷丁，1.75倍「半場大」捧得過！