賀芬咸捉史特加開年

猪拉多纳

嚴懲壞孩子冇人敢作反

踢波係講求團體合作，所以軍紀同實力一樣咁重要！賀芬咸雖然深陷降班漩渦，不過兩位球星韋爾斯同杜比亞斯韋斯開派對搞事，一樣受到內部嚴懲！雖然賀芬咸上場錄得作客連輸5場嘅紀錄，不過今晚返到主場迎戰近況更差嘅史特加，阿占依然力撐2.05倍主W。

（有線61、64、201及204周一凌晨0:30直播）
史特加近5場聯賽輸晒

賀芬咸今季認真黑仔，季初有波利斯胡錫域車禍重傷，上星期又有新兵路爾斯艾雲古拿炒車，今場未必趕得切上陣，最弊係韋爾斯同杜比亞斯韋斯唔生性，日前喺嘉年華會一齊飲大咗醉酒鬧事，唔單止被踢出派對，賀芬咸亦向兩人處以重罰，今場亦唔知會唔會獲派上陣。

不過咪以為賀芬咸少咗幾名主力就會冧檔，查實韋爾斯上個月已經因表現差被貶，唔用佢未必係壞事，最重要係今次事件顯示出軍紀甚嚴，其他球員肯定唔敢怠慢，隨時踢出更好成績。

客軍史特加就更加爭唔落，佢哋最近5場聯賽全部輸晒，加埋只係入咗3球而勁失14球，就算向曼聯借用意大利前鋒馬捷達，對戰績都無乜幫助，依家絕對係攻不銳、守不穩！今晚作客急切搶分護級嘅賀芬咸，真係凶多吉少。
頂占筍盤：賀芬咸（勝）