基爾禾搵傻豹着數

猪拉多纳

本周意甲早場由基爾禾鬥「傻豹」巴勒莫，上星期巴勒莫炒教練兼改聘馬利辛尼執教，無奈新帥未能激發起球員鬥志，主場對住佩斯卡拉都要失分，今仗要作客出戰就更難反彈。論狀態基爾禾都唔係好，不過對手的確弱勢，基爾禾憑地利之助應可順利勝出，主Ｗ捧得過。

（周日凌晨１時開賽）

巴勒莫曾經係意甲「兵工廠」，唔少好球員都出自呢支西西里島球隊，如卡雲尼、柏斯托尼、東尼等等，弊在老闆森柏連尼為求賺快錢，近年瘋狂放售高質主力，搞到球隊實力大幅下滑。

基爾禾遇到地獄賽程，近三場對手係拉素、祖記及國米，但衰衰哋都執番一場Ｗ，證明基爾禾教練哥連尼領導有方。講開哥連尼，好多球迷都知道哥連尼喺球員時代曾効力過巴勒莫，當年就靠佢努力而協助球隊回升甲組，所以唔少巴勒莫球迷都當佢係英雄。今次哥連尼以教練身份重臨巴勒莫，肯定要贏番場靚波，喺班舊球迷面前攞威。