費倫巴治又嚟出蠱惑？

猪拉多纳

大家好，《Deal假》呢個欄第一次同大家見面，我Deal兄之後會一路同大家（目及）實，邊場波有古怪，甚至係收到風有蠱惑，即時通知大家，呢個欄會唔定期出現，只要有料就一定同大家分享。

歐洲刑警早前宣布瓦解咗史上最大規模嘅假波案，佢哋從新加坡一個莊家開始抽絲剝繭，話有支亞洲大水喉射住呢個假波集團。但其實喺球壇搵錢嘅，又點會得一支水吖，依家南美、中東同東歐都大把資金，邊個老細肯畀錢，一定有人幫手。

上次單案都透露咗唔少假波做案詳情，連歐聯、歐霸呢啲被視為歐洲最高殊榮嘅球賽一樣有蠱惑，而且東歐球員最易收買，個主管仲話「只要搵個被欠薪幾個月嘅東歐球員，連我阿婆都搞得掂」，就知造假幾咁容易。
作客巴迪 邊隊落飛要邊隊

嗱，今日有場波大家要留意吓，白俄羅斯嘅巴迪主場對土耳其費倫巴治（周五凌晨2時開賽），費倫巴治前會長爾迪林同兩名球員，早兩年就因為假波鎯鐺入獄，仲令到球隊前年被踢出歐洲賽，上年六月歐洲足協先至減輕處罰，呢隊波有晒前科，真係睇見都驚。今次對手仲要係東歐球隊巴迪，白俄羅斯聯賽仲歇緊冬，但部分歐洲菠菜公司竟然有墊底飛，巴迪要讓平半，今場賽果究竟點開真係隨得佢哋話事，最好就係臨場睇飛玩，留意開波前最後15分鐘啲飛數變化，邊面落飛就一定跟得過。