費利拿後防穿窿撐布拉加

猪拉多纳

葡超今晚爆發「三哥大激鬥」，由布拉加主場恭候費利拿。無可否認費利拿今季戰績令人喜出望外，弊在佢哋近期後防穿晒大窿，頂唔頂得住布拉加嘅進襲係一大疑問，「讓主」有2.4倍博得過吖！

（開賽時間：周二凌晨4:00）

今季葡超繼續由波圖同賓菲加兩大班霸也文也武，之不過「三哥之爭」同樣咁有睇頭，費利拿目前揸住31分排第3，造出創會以嚟最佳成績，難怪巴拉圭中堅高漢尼雄心壯志，話好有信心取得季軍，攞到來屆歐聯入場券。

有信心還有信心，佢哋今仗造訪布拉加一啲都唔易踢，左閘安頓尼斯外借馬拉加後，頂上嘅路易斯蘇沙最近打咗柴，加埋紐盧山度士同中場悍將安達里奧分別因傷停問題缺陣，陣容都幾殘。
布拉加森巴外授否認離隊

無疑布拉加近況係曳，不過上仗失分畀比拉馬之後，主帥比斯路隨即大發雷霆炮轟後防唔夠集中，相信一班手足今仗會打醒十二分精神。比斯路賽前仲收到好消息，除咗守將麥斯夏斯刑滿復出之餘，巴西好波之人李安度沙連奴亦都拍心口保證唔會喺季尾離隊，想留効多兩至三年，人腳齊整兼且鬥志旺盛，隨時數費利拿一鑊勁。