曼聯着火 射爆修咸頓

猪拉多纳

英超一哥曼聯今輪主場迎戰下游球隊修咸頓，「紅魔鬼」四大射手今季喺各項賽事合共轟入47球，士哥仲多過99年三冠王前線黑、白雙煞同期總和，今仗又會恃住奧脫福主場氣勢窮追猛打，「聖人」頂唔住，蘇豪要「讓球主勝」！

（有線300及200台周四凌晨4時直播）

曼聯99年勇奪三冠王坐擁四大射手，黑、白雙煞約基、高爾、舒寧咸同蘇斯克查輪住發威，多線發展瓣瓣掂！「紅魔鬼」教頭費格遜今季複製呢條方程式，以尹佩斯同朗尼作主，韋碧克及查維亞靴南迪斯為副，四大前鋒喺各項賽事加埋入咗47球，黑、白雙煞當年同期貢獻46球，足見現時曼聯攻力之強。大軍拉隊去中東操到火噴噴，上場收起尹佩斯照樣輕取富咸，朗尼又士哥又助攻順番晒，等閒之輩難阻佢哋去路。
「聖人」留力砌韋根

修咸頓早前辭退教頭艾堅斯辣慶球迷，新帥普捷天奴領軍首戰賽和愛華頓贏口碑，成功安撫民心，佢哋近六場聯賽不敗全贏盤，面對阿仙奴同車路士都唔使輸，表現確係大有進步。不過，「聖人」作客奧脫福好惡打，冇把握搶到分，嚟緊嗰場鬥韋根先係目標所在，今戰未必會同「紅魔鬼」硬撼。再者，普捷天奴初到英超，若然唔識做同費Sir作對，嚟緊條路都幾難行，都係乖乖哋帶支靚紅酒孝敬費爵爺，再放低三分啦！