阿仙奴「大」走紅軍

猪拉多纳

禾確特領炮兵連狂轟

紅軍變番「正氣」遇強即屈，作客兵工廠凶多吉少！今輪英超快車重頭戲，阿仙奴主場迎戰利物浦，紅軍本季淨係恰到弱旅，盡失以往遇強愈強特性，故遭曼聯雙殺，主場鬥阿仙奴都輸。阿仙奴球星禾確特弗爆，讓得起平半，拿仁捧埋大盤！

（有線301及201台周四凌晨3時45分直播）

阿仙奴本季演出無疑稍有跌Watt，現排聯賽第六，但同第四嘅熱刺僅差四分，仍大有機會趕上取得來屆歐聯席位，餘下聯賽會場場當決賽咁打，面對傳統勁旅紅軍唔會留手。為挽留禾確特，領隊雲格終肯退讓畀佢多踢正前鋒，「禾仔」亦非常爭氣，近三仗場場有波入，續約之後相信會更加sharp醒。另外普多斯基、辛迪卡索拉續有貨交，同時基奧特亦生猛晒，近兩仗梅開二度；兵工廠炮台處處，相信可繼2012年兩度擊敗利物浦後，取得對賽三連勝。

人哋話「若要生活好、咪掂利物浦」，係因紅軍好難捉摸，睇好佢哋時，對弱旅贏唔到，睇死佢哋對強隊輸波，就往往不敗甚至贏埋，搞到投X者焦頭爛額。呢一點其實同紅軍打法有關，以往擅踢穩守突擊，所以踢下風波仲啱發揮；但本季羅渣士執教後，紅軍大踢攻擊足球，所以可以大炒弱旅，但對強隊時後防不穩問題就即時現形。
利物浦變臉欺善怕惡

睇番數據，目前紅軍贏咗9場聯賽，對手全部係聯賽榜11至20名球隊，鬥前10勁旅完全未贏過。面對曼聯被雙殺，鬥熱刺、阿仙奴甚至西布朗同史篤城，利物浦幾乎全部輸得清脆；作客守和車路士，就極有幸運成分在內。憑此特性推論，今戰主隊阿仙奴可秤先，而雙方近期後防甩漏甚多，可以兼顧大盤。