雷丁車仔勢演入球騷

猪拉多纳

車路士呢個禮拜都可以話係諸事不順，無論會方定球員，好似都唔係咁「老利」。球隊喺英聯盃4強出局不特止，夏薩特仲喺對史雲斯呢場準決賽次回合度，畀球證指係蓄意踢球童唔係踢波被罰紅牌，呢件事仲驚動埋警方，就算依家對方話唔再追究，但始終夏薩特都要面對停賽兩場懲罰。

之前有外國報章爆料話莫連奴同阿布拉莫域密密斟又互相ＳＭＳ，莫非有意叫莫帥上番車，幫手掃霉氣？「車仔」啱啱喺星期日踢足總盃作客對賓福特嗰場，雙方經過90分鐘激戰，最終2比2握手言和。好在多得丹巴巴亞傳球，費蘭度托利斯喺禁區線上右腳施射破網，先至和波收場，大難不死，加上下次重賽會返史丹福橋球場踢，車路士似乎仲有啲運仔。
近４次交手３開大

今晚返去踢英超，車路士依家排第三，由於同第二位嘅曼城相差六分，要趁早搶分爭下季歐聯入場券；同樣地，呢三分對急於要脫離降班威脅嘅主隊雷丁嚟講都好重要。雷丁近排個勢都唔錯，連埋上場足總盃大炒錫菲聯4比0，已經累積四連勝。睇番對賽，兩隊近４次英超交手有３次成功開出入球大，加加埋埋嘅理據，呢場續捧入球大絕對有道理。

（有線304及204台周四凌晨4時直播）
車車推介︰雷丁 大