巴塞奧沙「細」所難免

猪拉多纳

留力西盃鬥皇馬

巴塞隆拿今晚將於西甲主場出戰護級分子奧沙辛拿，「地上最強」上場精銳盡出，力壓馬拉加打入西班牙盃4強，嚟緊周中又要惡鬥皇家馬德里爭入決賽，小妹相信佢哋班主力美斯、沙維就算踢都唔一定搏，對住防線唔弱嘅奧沙辛拿未必數得多，入球中位數開3.5球，2.15倍細值冷敲。

（now632台周一凌晨2:00直播）
沙維或休戰 碧基停賽

巴塞喺西盃晉級當然值得高興，不過「球王」美斯右邊大脾就受咗輕傷，前日就因為要做物理治療冇練波，雖然尋日佢已經復操，《阿斯報》都話助教勞拉可能畀「美斯仔」落場，但就算佢真係出得，都未必會踢足，無謂為咗場唔算難贏嘅聯賽搏得太盡，寧留力周中對皇馬場西盃4強戰好過啦！

至於啱啱度過33歲生日嘅沙維近季亦頻受傷患困擾，休戰自然亦唔奇；至於桑治踢完西盃後亦因為藥檢搞到上周五先歸隊，今仗隨時都會暫列後備。相信就算有近5次上陣o趙入4粒嘅柏度洛迪古斯壓陣，亦未必可以好似之前咁撳住對手嚟砌。
「作客蟲」奧沙攻弱守強

另邊廂嘅奧沙辛拿，全季作客只係贏過中下游嘅愛斯賓奴，名副其實係條「作客蟲」。但唔講唔知，原來佢哋今季喺西甲嘅防守能力竟然仲好過巴塞o架，至今僅失21球，比「地上最強」仲要少2球，證明佢哋條防線其實唔差，家陣淪落到要護級，主要係因為奧沙辛拿踢咗20場聯賽都只得16球進帳，喺西甲火力最弱嘅球隊中「名列前茅」，就算巴塞有中堅碧基停賽，奧沙辛拿都唔見得有本錢入波做「入球騷」。