皇馬演入球騷 賀莫帥50大壽

猪拉多纳

人哋話牙痛慘過大病，「張峰」深明呢個道理，話說前幾日我剝咗令我隱隱作痛嘅智慧齒，雖然只係小手術，但就令我胃口大減，連球隊練習都參與唔到，冇得踢波對一個球員嚟講真係慘過大病呀！今晚西甲皇馬主場迎戰同市球會基達菲，就算入球中位數開3.5球，我照撐1.7倍「大」賀莫連奴50歲大壽！

（now632台周日晚7:00直播）

近期皇馬表現時好時壞，衰嗰陣可以賽和愛斯賓奴、奧沙辛拿呢啲下游分子，踢得好嗰陣作客連華倫西亞都畀佢炒5粒，球隊又頻頻傳出分黨分派，呢個唔妥嗰個、好似莫連奴尋日對外講完卡卡返AC米蘭，係個幾好嘅解決辦法之後，居然又公開話自己「返國米都唔錯吖」，真係唔知佢想點，與其估今場皇馬班人喺呢場馬德里打吡肯唔肯搏，不如向入球大細埋手，佢哋入得又失得，梗係要玩「大」佢。
卡斯拿斯長抖 即簽迪亞高洛迪古斯

皇馬喺西班牙盃晉級，不過就付出沉重代價，門將卡斯拿斯手掌骨折做手術，預計要抖8至12個禮拜，莫講話今晚唔出得，仲會錯過對曼聯嘅歐聯16強大戰，後備門將阿丹之前頂過「聖卡斯」，但根本就唔同Level，防守肯定問題多多。至於緊急簽入嘅西維爾門將迪亞高洛迪古斯，雖係皇馬青訓產品，但暫時都唔使預佢出場啦！好在C朗拿度一直保持高水準演出，令前線有一定嘅入球保證。

至於基達菲作客如果死守肯定冇運行，不如效法愛斯賓奴同皇蘇咁，同皇馬鬥踢進攻足球，隨時殺出一條血路。仲有，聽講皇馬會長皮里茲去年12月3號已經決定炒教練莫連奴，呢排莫帥成日玩對抗，係時候開番個「入球大」，為尋日50歲生日，話要教多20年波嘅自己減吓壓。