堤格雷搏殺響勝古

猪拉多纳

今屆南美自由盃揭開序幕，聽朝先有兩場外圍賽首回合上演，其中阿根廷球隊堤格雷於主場迎戰委內瑞拉嘅安索阿迪古，唔好睇堤格雷喺阿甲排尾二，其實該隊一向重視南美盃賽，今仗勢必藉住地利響頭炮，入多幾粒確保出線分組賽，「讓球主勝」有買趁早。

（周三早上7時15分開賽、馬會網上文字直播）

先講講賽制，今輪係自由盃外圍賽首回合，經兩回合主客賽事後，將有6隊會進身分組賽。若果係刨開績揀波嘅朋友，見到堤格雷喺阿甲秋個績，17場聯賽贏得1場咁大把，真係點都買唔落手。不過，凡事唔可以睇得咁表面，堤格雷喺聯賽踢得咁差係因為該隊成副心機放晒落南美球會盃，結果佢哋殺入南球盃決賽，只係不敵巴西聖保羅，實力不容忽視。
安索阿迪古作客捱打

既然堤格雷咁重視南美盃賽，出戰級別更高嘅自由盃，定必落多兩錢肉緊，最重要係依家阿甲未開咧，暫時唔使分心聯賽，相信球員會發揮得更好，加上只係對住委內瑞拉球隊安索阿迪古，為確保晉級，今仗必趁主場之利數得就數，安軍無力招架，「讓球主勝」捧得過。