米蘭打吡AC做好戲

猪拉多纳

06/05/2012
文： 鄭少偉

今晚聖西路球場上演意甲重頭戲米蘭打吡，國際米蘭為咗爭取下年歐洲賽資格，一定唔會放過AC米蘭！AC要喺祖雲達斯手上搶番個一哥位，今場亦都要為全取3分諗諗計。尤其是兩隊本身就係宿敵，各不相讓，今場肯定好睇過戲！（now633台及660台周一凌晨2：45直播）

國米老人後防甩漏多

國米自從炒咗教練雲尼亞里，由青年軍教頭史達馬斯安尼接手之後，一度做出一段6場不敗走勢，睇落有啲起色，但查實依然面對緊一個大問題，就係佢哋後防過分倚賴幾件老將，包括馬爾干、盧斯奧同森美爾，嚟到季尾活力欠奉問題就浮晒面，上場輸畀帕爾馬主因就係下半場盧斯奧一次犯錯，喺禁區附近帶波人前波後，轉唔切身畀對手撻走個波殺入禁區射入扳平，之後更加幾次走甩對手，埋下輸波伏線。中路守得唔穩，兩閘仲點敢成日上？兩閘少咗上前助攻，咪踢死奧比同沙拉迪囉，呢個情況對一啲攻力強勁嘅對手會更加嚴重，今場對AC預咗又會賴嘢。


最大劑係個賽期鬼咁頻密，15日踢5場，一來班後防又唔係十八廿二，二來今場仲要有史坦高域因傷提早放暑假，撞正為冠軍發晒茅嘅AC，「亨利」實在戥國米擔心，一於直取撐AC客W！

猪拉多纳