熱刺齊心破維拉

猪拉多纳

06/05/2012
文： Sherry

成個禮拜冇執筆同大家傾波，勁多嘢想講囉！哈！上星期小妹要幫人影Catalog，所以只係睇咗4場波，但4場都勁好睇！皇馬封王、巴塞主場大捷贈哥帥、曼市打吡，哈，不過講到印象最深嘅，反而係熱刺2：0贏布力般嗰場喎，點解？咪因為基爾獲加囉！


熱刺右閘基爾獲加喺上周日入咗個超靚罰球，小妹睇嗰陣真係嘩咗聲出嚟，之後仲即刻上網搵佢啲料，原來佢喺錫菲聯出道，之後就被夏利叔用900萬鎊帶去白鹿徑，近年都係周圍外借，直至今季回歸大熟大勇，上月底仲獲選為「最佳新星」添！年少得志未必一定囂嘅，早排有傳包括曼城在內嘅豪門想撬獲加，不過呢位21歲嘅英格蘭新星冇理佢哋，喺早兩日同熱刺續約至2017年，佢受訪嗰陣話續約係因為想報答夏利叔，難得爆紅依然識飲水思源，一於封獲加做新偶像啦！

維拉D賓 迪爾夫齊打柴

今晚熱刺作客阿士東維拉，小妹梗係撐獲加、捧1.78倍客勝啦！始終熱刺要為來屆歐聯席位搏命，最重要係自從夏利叔Confirm冇得教英格蘭後，熱刺即刻錄得兩連勝，一向小器嘅夏利叔，上周中仲主動同艾迪巴約破冰派佢落場，雲達華治尋日亦走出嚟撐夏利叔，話希望同佢長留熱刺拍住上喎。家陣呢班波咁團結，仲有邊隊可以頂得住佢哋先？


對家維拉就真係搞笑囉，輸吓一場輸下吓一場，搞到近8場聯賽不勝，無啦啦跌到落15位要護級，抵死！佢哋今晚仍然有戴倫賓特同迪爾夫養傷，食胡射手打柴，點搶分呀？維拉來季想反彈？快啲換帥，炒麥利殊啦！（有線201及301周日晚9：00直播）


百足咁多爪嘅大學生，熱愛運動，最鍾意同啲Friend唱K兼睇波，曼聯中場路爾斯安達臣同車仔前鋒費托都係佢杯茶！

Sherry靚盤

熱刺（客勝）

微博傳情 \(^O^)/

上星期小妹幫一本雜誌影Catalog，雖然努力減肥仍然冇乜成果，不過啲衫真係堅靚，小妹未修身都Carry到，如果換轉啲瘦底嘅人着嘅話，肯定鬼火咁靚啫！哈，小妹亦把握機會，每次換衫都二話不說，拿拿聲自拍幾張先！