衞冕莫迪變地頭蟲

猪拉多纳

06/05/2012
文： Mic少

上季挪超冠軍莫迪今季真係失威，踢完六輪聯賽，已經被榜首洛辛堡拋離六分。不過莫迪主場威力不減，三仗主場全勝，今晚喺自己地頭，對實力較次嘅阿里辛特，相信莫迪可以全取三分。（周一凌晨2時開賽）

阿里辛特作客差

莫迪今季最大問題係上季捧盃後，球隊求勝飢渴感有所下降，導致成績走樣。不過佢哋喺自己球迷面前，都唔敢放軟手腳，所以主場水準仍保持到，預料莫迪今仗又會發威。


阿里辛特開季後，聯賽六戰僅一勝，而且作客未贏過。阿軍後防表現仲愈來愈差，上次挪超作客竟然被新升班嘅漢福斯攻入三球，今仗到訪莫迪，形勢更危殆。