二線紅魔夠搏命 奧脫福「包」搞掂

猪拉多纳

08/03/2012
文： 力奇

力爭歐霸盃冠軍做安慰獎嘅曼聯，今晚嚟到16強首回合先喺主場迎擊西甲畢爾包，將有包括基斯史摩寧同路爾斯安達臣等邊緣球員復出擔正。球員個個搏命爭上位，鬥志唔會差，加上挾住聯賽3連勝氣勢，要贏有「恐英症」嘅畢爾包，仲唔食包咁食？2.12倍「讓球主勝」記得捧場呀！（有線61及201周五凌晨4:05直播）




雖然歐聯玩完，但紅魔鬼家陣仲力爭緊做聯賽同歐霸盃雙料冠軍，聯賽榜佢哋近排連贏3場後，只係落後宿敵曼城2分，爭標形勢唔算差，至於踢歐霸盃牌面睇又係同曼城之爭，球員絕對唔敢揸流攤。


小豌豆 貝碧孭飛


冇錯，周日聯賽贏完熱刺之後，曼聯領隊費格遜預計會收起史高斯、朗尼同里奧費迪南等正選，反而傷愈回歸嘅中堅基斯史摩寧、中場路爾斯安達臣，以及後備殺手查維亞靴南迪斯同貝碧托夫則會擔正。佢哋個個同樣實力非凡，只係今季上陣機會未算太多，難得落場自然會格外搏命。




當然，曼聯近4場歐戰主場只贏1場，唔係出色戰績，不過眾所周知奧脫福主場威力，其中上仗不敵阿積士，明顯係費Sir見首回合有2球喺手，先會大意輸波，之但係今戰係首回合，梗係贏得一球得一球啦！


畢爾包訪英腳軟


畢爾包呢邊，射手洛蘭迪自從1月復出，無疑係入球停不了，之前仲帶領球隊殺入西班牙盃決賽添。但咪話力奇潑佢哋冷水，西盃嘅級數同歐霸盃始終差啲啲，睇番往績，佢哋過往7次出訪英格蘭，竟然只得1和6負嘅恐怖戰績，今次又憑乜喺奧脫福爭勝，仲要撞正防線主力阿武列比達停賽，今鋪想輸少球都難。




賽果熱線：2707 9900

周五凌晨4時20分起至晚6時止

歐霸盃賽制

16強採主客兩回合制，今輪為首回合賽事，若兩回合總比數賽和，作客入球較多一方為勝，若作客入球數字相同，則在次回合90分鐘後加時30分鐘，若雙方在加時取得相同數量入球，由作客一方勝出，若加時沒有入球，則互射12碼分勝負。