|
都爾及紀仁安相繼客串期滿,剛戰各捧一盃走人,騎師陣營少了兩個額,部分公司騎師點都有得着,好似郭能就係其中一人,不單只在今期多馬騎,好幾匹仲要係機會馬,又係時候爭取成績。
而今晚郭能嘅最大支持來自姚本輝馬房,除了尾場「錢照贏」,所有馬交晒畀佢跑。二人合作以來,成績唔算特別出色,今季暫時兩場W,另外成日有合作馬跑入前列,好似啱啱「八佰匹」和「財神駕到」,雙雙跑入三甲,已顯示到佢哋合作幾有穩定性,所以,今晚二人之馬,點可能唔重視。
今晚郭姚配4匹馬之中,「鐵胆龍」只係跑過一場,底蘊未清楚,恕阿Jack睇唔通,但餘下3駒「盈豐快駒」、「精密紡」和「中環英雄」,既有近績支持,隔晚又有晒墊底飛,睇落對晒辦。
盈豐快駒檔靚
「盈豐快駒」上場沿路跟好位之下,返嚟跑獲第三名,可以黐住「喜發龍」過終點,已經有晒實力保證,今仗排1檔,預期又會有近似優勢,如非谷戰不合,短直路或者更啱佢跑。
至於「精密紡」與「中環英雄」,兩匹馬有唔少共同優點,近績好而路程合發揮,當屬爭勝籌碼。
Jack
|
|