馬主論戰

猪拉多纳

　　贏錢過年好溫暖

　　今日係兔年送歲戰，希望各位《成報》讀者齊齊贏錢，開心一吓。

　　推介第四場「溫暖先鋒」，在港初出嗰場已響泥地1200米入Q，證明場地性能出色，今次方嘉柏安排佢再跑泥地，擺明有心求開齋，值得捧場。

　　另外鍾意第五場「尊勝福星」，體重逾1300磅嘅大馬，熱身一仗之後，上場即刻響1400米開齋，今次繼續響四班上陣，真係唔容易搵到對手，連捷可期。　　張敬山

　　快達小子轉場掂

　　柏寶剛啱起孖兼封王，搏殺手風明顯轉順，今日繼續吼住佢啲馬應該冇錯。

　　推介第六場「快達小子」，上季曾經壓倒「明旺」贏馬，後駒剛戰亦已奏捷，證明賽事水準唔曳，今次跑番田草賽事，應該係時候起筷。

　　另外推介第九場「活力飛駒」，今季五戰全部有獎金，演出其實好準，今次轉嚟泥地上陣，對手唔算好強，用到柏寶操刀似乎有心打硬仗。　　任達華

　　千軍萬馬一鳴驚人

　　蔡約翰今日又有一批惡馬上陣，應可連場數胡。推介第三場「千軍萬馬」，今季蔡廐初出馬表現有目共睹，隨便數數已有「首飾孖寶」、「名舵主」同「育成王子」等一出即勝，相信呢隻馬都係揀手貨，有權一鳴驚人。

　　另外推介第七場「夢幻魔術」，近排白德民同蔡約翰合作可以話如魚得水，季內合作十次取得四冠兩亞，入Q率達六成，今次呢隻馬交畀白德民騎，點可以唔捧？　　寇鴻萍、梁廷鏘