受惠騎師荒 胯下多惡馬 今日白德民世界

猪拉多纳

　　今期賽事幾位大騎師繼續停賽，少咗韋達、柏寶、蔡明紹、德叔等等，點會唔鬧騎師荒，所以，令到好多騎師受惠，有部分人嘅坐騎數目係正常一倍有多，贏唔贏到係後話，最起碼有上陣機會嘛！

　　講到受惠嘅，白德民明顯笑晒口，韋達一停賽，上周中先執兩匹蔡廐W「正榮」和「精算縱橫」。而今期二人仲多咗合作，阿蔡8駒出戰，有一半畀咗神父跑，加上，波士大摩亦有一批重兵畀佢，呢期又點會唔係佢嘅世界，問題係贏幾多W而已！

　　隔晚望望賠率，「精彩遊戲」賣到得十幾廿蚊獨贏，處女馬身份憑咩咁？唔見得只因騎練合作效應，可能係啲風「吹」得行所致乎？當然，睇隻馬腳法，再跑長啲係好事，呢匹三哥有望坐正。

　　而摩廐「紀利威威」和「超皇鷹」，俱有近績支持，前駒初出60幾倍跑入P，擺明係爆胎之作，反映騎練都冇預期佢初出會咁叻，帶出呢匹馬手上有大量虛分，相信熱身過後，必然更醒。後駒新勝而臨，轉回1400米，唔應該會比短途失色，有望續有成績。　Jack