馬主論戰

猪拉多纳

        電訊超星必拼
        
        今日響北京有廿幾位朋友嚟咗香港，參加我今晚舉行嘅生日晚會，先響度歡迎佢哋。其中陳麗萍、何少更加會同我一齊入場，希望佢哋可以替幾匹「電訊」系馬帶嚟好運喇！
        
        我哋今日有幾匹馬出，其中第七場「電訊超星」上場追入第四已有走勢，今次話唔定可贏番一仗。另外推介第五場「小宇宙」，上場初出輸畀「名舵主」唔夠一個馬位得第四，質素唔會曳，今次可以補中。
        
        張敬山
        
        萬子千紅施回馬槍
        
        蔡明紹剛啱又憑「金瑞」贏馬，呢位後生仔近期手風真係好順，一於繼續捧佢啲馬。推介第六場「萬子千紅」，前仗挫「京城三寶」贏馬，後駒翌仗即贏馬補中，賽績硬淨；回氣一仗之後，隨時可施回馬槍。
        
        另外鍾意第八場「太極至尊」，以往響直路賽累積一冠一亞兩季，擺明路有專長，今季跑咗四仗已經熱夠身，排十一檔起步亦易發揮，話唔定有機會可以響度偷雞。
              
        任達華
        
        快馬當先縮程惡
        
        剛啱高伯新憑「金得意」同「光輝出擊」起孖，呢位新倉主果然唔簡單，今戰不妨吼實佢啲馬。推介第三場「快馬當先」，前仗響谷草一哩跑第三，證明今季狀態早備，上場增程跑大長途輸咗，唔使太過介懷，縮程跑番1600米要吼實。
        
        另外鍾意第八場「御鋒」，今季跑咗四仗無功後，即轉咗去高伯新馬房，今次轉倉初出，賽前已做足備戰工夫，回師直路賽隨時有驚喜。
        
        寇鴻萍、梁廷鏘