翔龍落飛得手

猪拉多纳

賀賢不嬲都同鄉里柏寶同聲同氣，合作無間，反而同冠軍騎師韋達就冇乜交收，佢哋對上一次合作已經數到舊年11月28日嘅「野馬」，而攜手贏馬就已經係09年４月19日嘅「好德煌」。不過喺尋日，由於柏寶停賽嘅關係，造就咗賀賢同韋達嘅合作機會，結果一拍即合，騎練靠第六場嘅「翔龍」搏殺得手，埋門仲着綠格4.5倍開跑，似乎對今戰充滿信心。
       
賀賢大讚韋達騎得出色。

賀賢賽後就話「翔龍」之前幾鋪都跑得唔曳，只不過排位唔好，先至上唔到名，而佢今勻係特登搵韋達幫手，而冠軍騎師亦不負所託，幫呢隻馬打開勝門。賀賢仲話「翔龍」仲有唔少進步空間，日後跑長啲都冇問題，但呢隻馬只係得四歲，部署上就唔心急，慢慢再畀時間佢成長。