洪禮賢講馬：重返勝途非常好

猪拉多纳

　　第六場三班1650米。同場之中有「披星戴月」、「飛騰」、「勁信心」等駒會擺前走，前中段唔應該偏慢，對一批後上馬而言，至少唔會環境惡劣冇得追。而「非常好」正正係靠直路冚嘅其中一員，預期形勢幾啱佢發揮。

　　上賽前此駒操練略有挑剔地方，事關出賽前兩周，工序放緩了，只係縮喺內圈踱步，雖然隻馬唔夠1千磅，工夫壓迫性未必要太大，卻未至於十幾日唔跳1課。而初出喺田草跑到包尾，唔覺係咩一回事，一來，草地能力唔強，二來，未開氣唔易付長途。不過，包尾還包尾，隻馬所負身位唔係好遠，同埋，騎者去到最後一百幾十米仲幾落力打緊，如以熱身賽角度睇，已經及格和收到想要效果。今賽即轉到此程，以佢去季同程贏馬姿態及級數，磅位稍重仍有贏面。

　　第七場三班1200米。「八發八中」上賽締速唔及同場另外兩匹新勝馬「天賜福星」及「駔驍駿駒」出色，但該兩駒相繼加磅，而佢忽然孭少11磅，來回數好襟計，四升三班亦未必怕。雖然過去佢喺三班輸嘅次數太多，畀人感覺完全唔夠班（12場僅1P），不過，以佢一再喺四班大勝返嚟，冇理由負120磅會冇得爭，仲要有埋1檔，大有條件連捷。

馬會賽馬節目主持　洪禮賢