銀袋日女馬主大豐收

猪拉多纳

尋日係莎莎婦女銀袋日，城中唔少名媛女星都有入場，場內一片艷光四射。而尋日啲女馬主又特別旺，好似啱啱辭咗政務司司長嘅唐英年，媽媽唐尤淑圻率先喺第四場四班千二靠愛駒「雙辣」建功。到咗第六場，就有鄭東漢太太馮元璋隻「搖滾雄豐」建功，兼打開勝門同幫郭立基攞到沙田首W，零舍有意義。
       
搖滾雄豐力壓大熱門好好機會，爆冷開齋。

其實呢隻「搖滾雄豐」今季轉咗去薛達志馬房後，表現循序漸進，啱啱上鋪輸咗畀「雙龍出海」後，今鋪再跑番呢個路程順利補中。
       
婦女銀袋日大旺女馬主，唐英年媽咪唐尤淑圻贏雙辣，鄭東漢太太馮元璋（無到場）則勝出搖滾雄豐。

薛達志賽後講番話呢隻馬最初嚟到佢馬房時，健康有唔少問題，又有內出血情況，但經過一段時間調理，目前已經冇大問題。
       

佢仲話呢隻馬要熱夠身先會表現得好，同埋依家千四已經嫌短，日後可以再跑長啲，佢有信心仲可以幫隻馬贏多W。