危險大軍締造好好機會 蔡明紹全面進攻

猪拉多纳

　　上文提及嘅大告，固然係季初練馬師嘅好榜樣，跑咗6期，繼續做童軍（日行一善）。而佢已經有6W在手，暫時仍在練馬師榜領先。至於騎師方面，兩大巨頭韋達及柏寶，仍然係「立油」，目前排頭位係蔡明紹，6期賽事後，又係贏咗6W，畀佢上榜首，真係有啲感意外。

　　但意外歸意外，今期蔡明紹坐騎唔係講玩，望落佢9匹坐騎，幾乎係全攻型咁滯，唔係阿Jack口多多，如果佢今日1場都贏唔到，唔喺馬匹亮相圈畀馬迷噓爆先奇！當然，平心而論，有好馬在手亦要有天時地利，只要場地冇乜大變化，影響唔到啲馬，佢今日唔起孖，應該要打屁股！

　　由於紹仔比較多餐士馬，揀唔晒咁多，選定3駒「好好機會」、「危險大軍」及「締造美麗」作重心。先講「好好機會」與「危險大軍」，前駒上場新馬插班初出，飛數已經勁，落場跑亦好，輸唔遠而入Q，預期再跑會更叻；「危險大軍」一出即勝好easy，四升三班冇轉路程，阻力冇咁大。而馬王級嘅「締造美麗」好少唔入三甲，如果唔揀呢匹馬，硬係心癢癢。　Jack