期期贏馬上頭位 告達理有力祥勝

猪拉多纳

　　睇睇目前練馬師榜排名，頭位並唔係蔡東摩方等大倉其中一個，反而係告達理，暫時結果算唔算意外？筆者覺得爆半冷！但問心講，唔通去到季中仲會係咁咩？！如果啲大倉相繼唔發功，馬場成地眼鏡踩爛晒之外，一眾馬迷相信都唔慌會「止到血」。

登榜首值得致敬

　　不過，大告登榜首的確值得致敬，你估咁易在強人林立之下「標」出嚟！少啲本事都唔得，而佢仲叻到期期有馬贏，再睇番佢啲頭馬，「時尚風采」養得番，抵讚！「愜意小開」名氣大，終於識贏，更抵讚！而「雙龍出海」轉倉即勝就仲犀利！

　　好嘞，今期佢出馬6匹，個人比較睇好「祥禎」及「得力助手」，前駒季初首仗入Q，末段追勁猶如風捲殘雲，如果當時衝得順啲，頭馬未必會係「期望」，雖然呢匹馬向來冇打叠好，希望大告運氣搭夠，可打破宿命。

　　而「得力助手」近績唔係好，不過分數已降至有利水平，假使熱身後令進度回甦，不難在這水準較低的場合發難。

Jack