洪禮賢講馬：吼徐雨石馬房總有驚喜

猪拉多纳

　　上季徐雨石馬房以44W完成，排在練馬師榜前列，成績創高位，能否再向另一高峰進發屬後話，不過，現階段此廐仍擁大批兵源，倘換血速度持衡，相信要保持佳績並唔係難事。

　　筆者向來對於徐廐幾有好感，久唔久喺直播時亦會講，呢類馬房有樣好，就係經常會畀到馬迷驚喜，時不時有冷嘢跑出，我自己中唔中到，係眼光同緣份嘅問題，至於係咪馬房爆軚之作，則係另一個問題。

　　但如果鍾意捉冷門馬嘅馬友，吼徐廐馬，斷唔會未試過有意外收穫（至少我記得幾年前，自己曾中過此廐「上浦福星」1次，當年季初爆99倍W嗰場）。

近兩季不乏冷W

　　而此廐唔係冇熱門贏過，上季第1W「愛拼者贏」，已經係大熱門，季初跟住贏嘅「中華寶寶」、「勁有盈」、「清新空氣」等，統統唔係大熱就係次熱。當然，冷W其實唔係少，近兩季為例，巨冷獨贏有38倍「確奇妙」、99倍「偉龍」、39倍「金紫荊」、43倍「宇宙良駒」等等。

　　總括而言，由於此廐仍有唔少新血補給，前景仍然樂觀，而作為馬友嘅你我，自然希望廐主繼續發揮驚喜教主本色。