高清睇跑馬：飛躍之駒質素超班

猪拉多纳

　　第六場四班1400米草地，「飛躍之駒」頭三戰配搭強勁，鞍上人唔係柏寶就韋達，已話你知係好馬，大前仗更瘋狂落飛至大熱開跑，如果輸實力冇得好講，但因心律不正以致表現失準卻不服氣，好彩復原得快，休息不足一個月即報爭總場次609，結果配史卓棟殺入亞軍，更跑出0.56.45，僅輸畀實力超班的「首飾達寶」。上仗馬房決定不為牠報跑草地賽，改攻總場次674泥地1200米，縱使欠缺經驗又排外檔，一樣被捧成大熱，胸有成竹下終於得手，最厲害是全程三叠，蝕位無數照贏，亦因為姿態超班，賽後足足加了八分，幸好能續戰四班賽，仍有優勢，唔跑早前泥地勝途，增程至1400米相信非無的放矢，改配騎練合作三駒全勝的吳嘉晉，信心之選。

中華寶寶愈戰愈勇

　　第七場四班1800米草地，「中華寶寶」季初已取兩捷，第二場頭馬更於四班取得，之後亦次次跑近，顯示留此班必有勝算。牠其後未能取得突破，一來跑法被動，二來落腳轉慢，一哩賽已後上不及，石哥決定改向1800米進軍，可惜場場被阻，前仗甚至慘坐包廂，全程未能望空。谷戰效果欠佳，上仗練者再變招，轉戰總場次677田草1800米，直路夠長步速亦快，本利歸還再贏一鋪，驚喜在轉彎走四、五叠，直路衝刺仍勁如炮彈，大勝兩個多身位，表現極之超級，可見大把在手又愈戰愈勇。今次再戰四班賽甚有着數，添食在望。

Sam